Харамсалтай мэдээ
Олимпийн наадам сүр дуулиантай нээлтээ хийхийн өмнө нэгэн таагүй мэдээ дэлхийн дахиныг цочроолоо. Гүржийн чаргачин Нодар Кумариташвили бэлтгэлийн сүүлчийн гулгалтын үеэр 90 миль/цагийн хурдтай давхиж байх үедээ осолд орж хорвоогийн мөнх бусыг үзүүлжээ.
Олимп болж буй Вистлер тосгоны гулгуурын төвд энэхүү осол болсон бөгөөд түүнийг осолд орсны дараа ОУОХ-ы эмнэлгийн баг нисдэг тэргээр эмнэлэгт хүргэсэн ч нэгэнт хожимдсон байжээ.
Дөнгөж 21 настай Нодар Кумариташвили дэлхийд чансаагаараа 41-р байранд бичигдэж байсан бөгөөд энэ жил дэлхийн цомын таван гараанд уралдсан залуу тамирчин байжээ. Энэхүү осол нь түүний Ванкуверт ирснээс хойшхи хоёр дахь осол байсан гэнэ. Энэ долоо хоногийн эхэнд мөн чарганаасаа унаж 152 метр орчим өндрөөс гулгаж унасан гэнээ. Дэлхийд хамгийн өндрөөс унасан тохиолдол ч гэж зарим нь хэлж байна. Тэр тэгж унахад бага зэргийн л зовиуртай унасан бөгөөд эмчилгээг түргэн хийж эргэн чарганы замдаа гарч ирсэн нь энэ байжээ.
ОУОХ хэвлэлийн баг хурал хийлгэсэн ба ерөнхийлөгч Жак Рогге түүний нас барсныг мэдэгдлээ. Тэр “ОУОХ эмгэнэлээ илэрхийлж байна. Бэлдээгүй, бодож байгаагүй зүйл боллоо. Үнэхээр харамсаж байна” хэмээн мэдэгджээ.
Үүний дараа Гүржийн багийн ахлагч : “Бидэнд нөхөж баршгүй гарз тохиолдлоо. Бид хүнд байдалд орлоо. Юу хийхээ ч мэдэхгүй байна. Бид олимпийн нээлтийн ажиллагаа, тэр бүү хэл олимпийн наадамд оролцохгүй байх талаар ярилцсан. Гэвч олимпизмийн үйл хэргийн төлөө оролцохоор шийдвэрлэлээ ” гэлээ. Тэд нээлтийн ажиллагаанд Гүржийн далбаан дээр хар тууз татан оролцсон юм.
Энэхүү тохиолдол нь олимпийн үеэр хүний амь нас эрсдсэн гурав дахь тохиолдол ажээ. Өмнөх хоёр тохиолдол хоёул 1964 оны Инсбрукийн олимпоор болж байсан аж. Нэг тамирчин нь Британий чаргачин байсан бол нөгөө нь Австрийн уулын цаначин байжээ. Уулын цаначин нь мод мөргөж нас барж байж.
Ер нь олимпийн чарганы замыг шүүмжлэх хүмүүс их байна. Гүржийн баг шууд зам муу байсан тухай мэдэгдсэний дараа бусад тамирчид энэ тухай үгээ хэлсээр байна. 100 км цагийн хурдтай явахад л хүнд болж байгаа тухай хэлж байна.
0 Сэтгэгдэл:
Post a Comment